नुवाकोटमा रोजगार केन्द्र खोलिदेऊ सरकार : अधिवक्ता रामेश्वर भण्डारी
नुवाकोट — अधिवक्ता रामेश्वर भण्डारीले नुवाकोट जिल्लामा बढ्दो बेरोजगारी समस्यालाई समाधान गर्न तत्काल प्रभावकारी कदम चाल्न सरकारसँग आग्रह गर्नुभएको छ। उहाँले जिल्लाका १२ वटै स्थानीय तहलाई समेट्ने गरी एकीकृत “रोजगार केन्द्र” स्थापना गर्नुपर्ने आवश्यकता औंल्याउनुभयो।
भण्डारीका अनुसार नुवाकोटमा कृषि, पर्यटन, साना तथा घरेलु उद्योग लगायतका क्षेत्रमा पर्याप्त सम्भावना हुँदाहुँदै पनि योजनाबद्ध व्यवस्थापनको अभावका कारण युवाहरू वैदेशिक रोजगारीतर्फ पलायन हुन बाध्य भएका छन्। “स्थानीय स्तरमै रोजगारी सिर्जना गर्न सकियो भने आर्थिक विकाससँगै सामाजिक स्थायित्व पनि कायम हुन्छ,” उहाँले भन्नुभयो।
उहाँले प्रस्ताव गर्नुभएको रोजगार केन्द्रले सीप विकास तालिम, रोजगारी सूचना प्रवाह, उद्यमशीलता प्रवर्द्धन तथा लगानी सहजीकरण जस्ता सेवाहरू एकै स्थानबाट प्रदान गर्न सक्ने बताउनुभयो। यसले स्थानीय युवालाई आफ्नै जिल्लामा रोजगारी तथा व्यवसाय गर्न प्रेरित गर्ने विश्वास व्यक्त गर्नुभयो।
भण्डारीले संघीय, प्रदेश र स्थानीय तहबीच समन्वय गरी ठोस नीति तथा कार्यक्रम ल्याउनुपर्नेमा जोड दिँदै, “नुवाकोटलाई आत्मनिर्भर बनाउन रोजगार केन्द्र स्थापना पहिलो कदम हुन सक्छ,” भन्नुभयो।
स्थानीयवासीहरूले पनि यस्ता पहलले गाउँमै अवसर सिर्जना हुने अपेक्षा गरेका छन्।
