नुवाकोट — तादि गाउँपालिका–४ अन्तर्गत बाघमारा क्षेत्रमा सुन्दरादेवी जनशक्ति युवा क्लबद्वारा आयोजना गरिएको श्रमदान कार्यक्रम उत्साहजनक जनसहभागितासहित सफलतापूर्वक सम्पन्न भएको छ।
स्थानीय सरसफाइ तथा सामुदायिक विकासलाई लक्षित गरी आयोजना गरिएको उक्त कार्यक्रममा स्थानीयवासी, युवाहरू तथा विभिन्न सरोकारवाला पक्षहरूको सक्रिय सहभागिता रहेको क्लबले जनाएको छ। कार्यक्रममार्फत क्षेत्रको सरसफाइ र सामुदायिक एकताको सन्देश प्रवाह भएको आयोजकले विश्वास लिएको छ।
कार्यक्रम सफल बनाउन प्रत्यक्ष तथा अप्रत्यक्ष रूपमा सहयोग गर्ने सम्पूर्ण नागरिक तथा क्लबका सक्रिय सदस्यहरूलाई आयोजकले धन्यवाद व्यक्त गरेको छ। सहभागीहरूको सक्रियता बिना यस्ता सकारात्मक अभियान सम्भव नहुने क्लबको भनाइ छ।
यसैबीच, तादि–४ का वडा अध्यक्ष अश्विन कुमार पाण्डे र वडा सदस्य विष्णु अधिकारीले सहभागीहरूका लागि खाजाको व्यवस्था गरी महत्वपूर्ण सहयोग पुर्याएकोमा विशेष धन्यवाद व्यक्त गरिएको छ। त्यस्तै, प्रभु डाँडा टोल सुधार समितिले रु. ९,००० आर्थिक सहयोग प्रदान गरी कार्यक्रमलाई थप सशक्त बनाएकोमा आयोजकले आभार प्रकट गरेको छ।
सामाजिक सञ्जालमार्फत कार्यक्रमको प्रचार–प्रसारमा सहयोग गर्ने सबैलाई पनि धन्यवाद दिइएको छ।
आगामी दिनहरूमा पनि यस्तै सहकार्य, एकता र सकारात्मक सोचका साथ क्षेत्रको विकास, सरसफाइ र सामुदायिक अभियानलाई निरन्तरता दिने प्रतिबद्धता क्लबले जनाएको छ।
