तादी गाउँपालिका–१ काल्चेमा २ विद्यालयका २६० विद्यार्थीलाई न्यानो कपडा वितरण
नुवाकोट । शिक्षा समाज सुधारको मेरुदण्ड भएको उल्लेख गर्दै तादी गाउँपालिका वडा नं. १ काल्चेमा अवस्थित भौगोलिक रूपमा विकट क्षेत्रका मंगलेश्वरी आधारभूत विद्यालय र कल्पेश्वरी आधारभूत विद्यालयमा अध्ययनरत २६० जना विद्यार्थीहरूलाई न्यानो कपडा वितरण गरिएको छ।
जाडो मौसममा विद्यार्थीहरूलाई केही राहत पुर्याउने उद्देश्यले वडा अध्यक्ष अर्जुन तामाङको आग्रहमा कार्यक्रम आयोजना गरिएको हो। कार्यक्रम पूर्व माननीय के. हितबहादुर तामाङको प्रमुख आतिथ्यतामा सम्पन्न भएको थियो।
कार्यक्रममा प्रमुख अतिथि तामाङले विद्यार्थी भाइबहिनीहरूलाई न्यानो कपडा वितरण गर्दै शिक्षा क्षेत्रमा सबैको साझा जिम्मेवारी रहने बताउनुभयो। उहाँले दुर्गम क्षेत्रका विद्यालय तथा विद्यार्थीहरूलाई प्राथमिकतामा राखेर सहयोग गर्नुपर्ने आवश्यकता औँल्याउनुभयो।
कार्यक्रममा युवा नेता किरण रिजाल तथा तादी गाउँपालिका उपाध्यक्ष सन्जु प्याकुरेल श्रेष्ठको पनि उपस्थिति रहेको थियो। उपस्थित अतिथिहरूले शिक्षा र सामाजिक सेवामा सहकार्य आवश्यक रहेको धारणा व्यक्त गर्दै यस्ता कार्यक्रमले विद्यार्थीहरूको मनोबल बढाउने बताएका छन्।
स्थानीय विद्यालय प्रशासन र अभिभावकहरूले विद्यार्थी लक्षित सहयोगप्रति आभार व्यक्त गर्दै आगामी दिनमा पनि यस्ता सामाजिक तथा शैक्षिक कार्यक्रम निरन्तर हुने अपेक्षा व्यक्त गरेका छन्।
