इन्टरनेट सर्वसुलभ बनाउन सञ्चार मन्त्रीलाई अधिवक्ता भण्डारीको आग्रह
काठमाडौं — नेपाल सरकारका सञ्चार तथा सूचना प्रविधि मन्त्री डा. बिक्रम तिमिल्सिनालाई इन्टरनेट सेवा सर्वसुलभ, सस्तो र गुणस्तरीय बनाउन अधिवक्ता रामेश्वर भण्डारीले आग्रह गरेका छन्।
अधिवक्ता भण्डारीले डिजिटल नेपालको अवधारणा प्रभावकारी रूपमा कार्यान्वयन गर्न इन्टरनेट पहुँचलाई आधारभूत अधिकारकै रूपमा स्थापित गर्नुपर्ने बताएका छन्। उनले देशभरका नागरिकले सहज, भरपर्दो र किफायती इन्टरनेट सेवा प्राप्त नगरेसम्म डिजिटल सरकारको लक्ष्य अधुरो रहने उल्लेख गरे।
उनका अनुसार ग्रामीण तथा दुर्गम क्षेत्रमा अझै पनि इन्टरनेट पहुँच सीमित रहेको छ, जसका कारण शिक्षा, स्वास्थ्य, व्यवसाय तथा सरकारी सेवामा समान पहुँच सुनिश्चित हुन सकेको छैन। “डिजिटल सरकारको नारा मात्र पर्याप्त हुँदैन, सबै नागरिकसम्म इन्टरनेट सेवा पुर्याउने ठोस नीति र कार्यान्वयन आवश्यक छ,” उनले भने।
भण्डारीले इन्टरनेट सेवा प्रदायकहरूलाई नियमन गरी शुल्क घटाउने, गुणस्तर सुधार गर्ने र देशभर समान पहुँच विस्तार गर्ने दिशामा मन्त्रालयले ठोस कदम चाल्नुपर्नेमा जोड दिएका छन्।
यसैबीच उनले सूचना प्रविधिमा आधारित सेवा विस्तारले पारदर्शिता, सुशासन र नागरिक सहभागिता बढाउने विश्वास व्यक्त गर्दै सरकारलाई डिजिटल पूर्वाधारमा लगानी बढाउन आग्रह गरेका छन्।
