अवलोकन र भ्रमणबाट पालिकाले नागरिकलाई के उपलब्धि दियो ? : अधिवक्ता रामेश्वर भण्डारी
नुवाकोट । अधिवक्ता रामेश्वर भण्डारीले नुवाकोटका स्थानीय तहहरूले पटक–पटक गर्ने अवलोकन भ्रमण, अध्ययन यात्रा र गोष्ठीबाट नागरिकले वास्तविक रूपमा के उपलब्धि पाए भन्ने विषयमा गम्भीर प्रश्न उठाएका छन्।
उनले स्थानीय सरकारहरूले विकास, सुशासन र सेवा प्रवाह सुधारको नाममा विभिन्न जिल्ला तथा विदेशसम्म अवलोकन भ्रमण गर्ने गरे पनि त्यसको प्रत्यक्ष प्रभाव नागरिकको जीवनमा देखिन नसकेको बताएका छन्।
भण्डारीले भने, “जनताको करबाट खर्च गरेर गरिने भ्रमण र अध्ययनले स्थानीय स्तरमा नयाँ योजना, रोजगार, कृषि, शिक्षा, स्वास्थ्य वा पूर्वाधार विकासमा कति योगदान पुग्यो भन्ने मूल्यांकन हुनुपर्छ । केवल भ्रमण गर्ने, फोटो खिच्ने र प्रतिवेदन बनाउने काम मात्रै हुनु हुँदैन ।”
उनले स्थानीय तहले भ्रमणपछि प्राप्त अनुभवलाई व्यवहारमा लागू गर्न नसके जनतामा निराशा बढ्ने बताए। उनले भ्रमणको नाममा हुने अनावश्यक खर्च नियन्त्रण गर्दै जनताका आधारभूत आवश्यकता पूरा गर्न बजेट केन्द्रित गर्नुपर्ने धारणा राखे।
भण्डारीले स्थानीय सरकारहरूलाई पारदर्शिता, उत्तरदायित्व र परिणाममुखी कार्यशैली अपनाउन आग्रह गर्दै भ्रमणबाट प्राप्त उपलब्धिको सार्वजनिक समीक्षा गर्न पनि माग गरेका छन्।
