सुन्दरादेवी आधारभूत विद्यालयको ४२औँ वार्षिकोत्सव सम्पन्न
नुवाकोट । विदुर नगरपालिका वडा नं. ७ स्थित सुन्दरादेवी आधारभूत विद्यालयको ४२औँ वार्षिकोत्सव तथा अभिभावक दिवस, शिक्षक सम्मान, शिक्षक विदाइ, अभिभावक सम्मान र पुरस्कार वितरण कार्यक्रम २०८२ मा सभ्य र भव्य रूपमा सम्पन्न भएको छ।
कार्यक्रम विद्यालय व्यवस्थापन समितिका अध्यक्ष शान्ती तामाङको सभापतित्वमा सम्पन्न भएको हो। कार्यक्रममा विदुर नगरपालिका उपप्रमुख प्रभा बोगटी प्रमुख अतिथि रहेकी थिइन् भने वडा नं. ७ का वडा अध्यक्ष रविन्द्र नेपाल विशेष अतिथिका रूपमा उपस्थित थिए।
कार्यक्रममा झंकनाथ अधिकारी, डा. भिमलाल तामाङ, विद्यालय व्यवस्थापन समितिका पूर्व अध्यक्ष तथा पदाधिकारीहरू, शिक्षक–अभिभावक संघका प्रतिनिधि, शिक्षाप्रेमी, बुद्धिजीवी, अभिभावक तथा विद्यालयलाई निरन्तर माया र सहयोग गर्दै आएका महानुभावहरूको उल्लेखनीय उपस्थिति रहेको थियो। विद्यार्थीहरूको उत्साहजनक सहभागिताले कार्यक्रमलाई अझ जीवन्त बनाएको थियो।
समारोहका क्रममा विद्यालयमा योगदान पुर्‍याएका शिक्षकहरूलाई सम्मान तथा विदाइ गरिएको थियो भने विभिन्न क्षेत्रमा उत्कृष्ट प्रदर्शन गर्ने विद्यार्थी र सहयोगी अभिभावकहरूलाई पुरस्कार तथा सम्मान प्रदान गरिएको थियो। वक्ताहरूले सामुदायिक विद्यालयको शैक्षिक गुणस्तर सुधारका लागि सबैको साझा प्रयास आवश्यक रहेको धारणा राखेका थिए।
विद्यालय परिवारले कार्यक्रम सफल बनाउन सहयोग गर्ने सम्पूर्ण अतिथि, अभिभावक, शिक्षक, विद्यार्थी र सरोकारवालाप्रति धन्यवाद व्यक्त गरेको छ।