पुरानो पहिचान हराउँदै अमर ज्योति मावि ? इतिहास जोगाउन पुरानै शैलिको भवन आवश्यक : अधिवक्ता रामेश्वर भण्डारी
नुवाकोट ।
अधिवक्ता रामेश्वर भण्डारीले नुवाकोटको तादी गाउँपालिका–खरानीटारस्थित अमर ज्योति माध्यमिक विद्यालयको ऐतिहासिक पहिचान क्रमशः हराउँदै गएकोप्रति चिन्ता व्यक्त गरेका छन् । उनले विद्यालयको पुरानो शैलिको भवन हटाएर नयाँ संरचना निर्माण गरिनु विकासको पक्ष भए पनि विद्यालयको मौलिक इतिहास र पहिचान जोगाउन आवश्यक पहल हुनुपर्ने बताएका छन् ।
भण्डारीले अमर ज्योति माध्यमिक विद्यालय कुनै सामान्य विद्यालय मात्र नभई नुवाकोट जिल्लाको शैक्षिक इतिहाससँग जोडिएको महत्वपूर्ण संस्था भएको उल्लेख गर्दै विगतमा जिल्लाकै उत्कृष्ट विद्यालयका रूपमा परिचित रहेको स्मरण गरे । उनका अनुसार विद्यालयको पुरानो भवन शैली, संरचना र वातावरणले विद्यालयको छुट्टै पहिचान निर्माण गरेको थियो ।
“पुरानो भवन केवल इँटा र सिमेन्टको संरचना मात्र थिएन, त्यो विद्यालयको इतिहास, पहिचान र भावनासँग जोडिएको सम्पत्ति थियो,” भण्डारीले भने, “नयाँ भवन निर्माण आवश्यक भए पनि पुरानो शैलिको स्वरूप संरक्षण गर्दै पुनः निर्माण गर्ने सोच आवश्यक छ ।”
उनले विद्यालयको ऐतिहासिक स्वरूप संरक्षण गर्न स्थानीय सरकार, विद्यालय व्यवस्थापन समिति, पूर्व विद्यार्थी तथा समुदाय एकजुट हुनुपर्ने बताए । पुरानो शैली झल्किने संरचना पुनः निर्माण गर्न सके विद्यालयको मौलिकता जोगिनुका साथै नयाँ पुस्ताले पनि इतिहास बुझ्ने अवसर पाउने उनको धारणा छ ।
भण्डारीले एक समय जिल्लाकै उत्कृष्ट र नमुना विद्यालयका रूपमा चिनिएको अमर ज्योति मावि पछिल्लो समय किन पछि पर्दै गएको हो भन्ने विषयमा गम्भीर समीक्षा आवश्यक रहेको बताए । उनले शैक्षिक गुणस्तर, व्यवस्थापन, भौतिक पूर्वाधार र समग्र शैक्षिक वातावरणबारे सम्बन्धित पक्षले ध्यान दिनुपर्ने आवश्यकता औंल्याए ।
उनका अनुसार इतिहास बोकेका शैक्षिक संस्थाको संरक्षण गर्नु केवल भवन जोगाउनु मात्र नभई समाजको पहिचान, स्मृति र शैक्षिक गौरव जोगाउनु पनि हो ।
