नुवाकोटको बामपंथी आन्दोलन गैर–बामपंथीहरूले कब्जा गरे, आन्दोलन जोगाउन स्वतन्त्र बामपंथी एकता अनिवार्य : अधिवक्ता रामेश्वर भण्डारी
नुवाकोट ।
अधिवक्ता रामेश्वर भण्डारीले नुवाकोटमा लामो समयदेखि स्थापित बामपंथी आन्दोलन अहिले सिद्धान्तभन्दा व्यक्तिगत स्वार्थ, अवसरवाद र गैर–बामपंथी प्रभावको चपेटामा परेको बताएका छन् । उनले वास्तविक बामपंथी मूल्य, विचार र जनमुखी राजनीतिलाई जोगाउन स्वतन्त्र बामपंथी शक्तिहरूबीच एकता अपरिहार्य भएको धारणा व्यक्त गरे ।
भण्डारीले बामपंथी आन्दोलन जनताको अधिकार, समानता, सामाजिक न्याय र परिवर्तनको आधारमा स्थापित भए पनि पछिल्लो समय आन्दोलनभित्रै विचारहीनता, गुटबन्दी र सत्ता–केन्द्रित प्रवृत्ति हाबी भएको बताए । उनले आन्दोलनको नाम प्रयोग गरेर गैर–बामपंथी चरित्र बोकेका व्यक्तिहरूले संगठन र नेतृत्व कब्जा गर्दा वास्तविक कार्यकर्ता निराश बनेको उल्लेख गरे ।
“बामपंथी आन्दोलनलाई जोगाउने हो भने अब सिद्धान्तनिष्ठ, इमानदार र जनताप्रति उत्तरदायी शक्तिहरू एक ठाउँमा उभिनुपर्छ,” उनले भने, “जनताको पक्षमा संघर्ष गर्ने वास्तविक बामपंथीहरू विभाजित भइरहँदा अवसरवादीहरू बलियो भएका छन् ।”
उनले नुवाकोटको राजनीतिक इतिहासमा बामपंथी आन्दोलनले महत्वपूर्ण योगदान दिएको स्मरण गर्दै अहिलेको चुनौती भनेकै आन्दोलनको मौलिकता र जनविश्वास जोगाउनु रहेको बताए । भण्डारीका अनुसार बामपंथी राजनीति केवल चुनाव जित्ने माध्यम नभई समाज परिवर्तनको वैचारिक अभियान भएकाले त्यसलाई व्यक्तिगत लाभको साधन बनाउन नहुने धारणा राखे ।
अधिवक्ता भण्डारीले युवा पुस्तालाई पनि विचार, सिद्धान्त र जनउत्तरदायित्वसहित राजनीतिमा सक्रिय हुन आग्रह गर्दै निष्ठावान र स्वतन्त्र बामपंथी शक्तिहरूको साझा मोर्चा निर्माण गर्न समयको आवश्यकता रहेको बताए ।
