नुवाकोट, तादी।
गणतन्त्र दिवस तथा सगरमाथा दिवसको अवसरमा तादी गाउँपालिकाको समन्वय तथा ग्रीन तारा फाउण्डेशनको आयोजनामा २०८३ जेठ १५ र १६ गते सञ्चालन भएको दोस्रो अन्तर–विद्यालय उपाध्यक्ष कप छात्रा भलिबल प्रतियोगिता भव्य रूपमा सम्पन्न भएको छ।
समापन समारोह तादी गाउँपालिकाका अध्यक्ष सन्तमान तामाङको प्रमुख आतिथ्यता तथा गाउँपालिका उपाध्यक्ष सन्जु प्याकुरेलको सभाध्यक्षतामा सम्पन्न भएको थियो।
कार्यक्रममा ग्रीन तारा फाउण्डेशनका संस्थापक तासी तेन्जिङ शेर्पा र अध्यक्ष बन्दी निमा शेर्पा विशेष अतिथिका रूपमा उपस्थित रहेका थिए। त्यसैगरी वडा अध्यक्ष अश्विन कुमार पाण्डे, कार्यपालिका सदस्यहरू, वडा सदस्यहरू, नेकपा तादी गाउँपालिका संयोजक तथा बागमती प्रदेश समिति सदस्य रोशन श्रेष्ठ, विभिन्न राजनीतिक दलका प्रतिनिधिहरू, अमर ज्योति प्राविधिक विद्यालयका प्रधानाध्यापक सुरेन्द्र अधिकारी, सुन्दरादेवी माध्यमिक विद्यालयका प्रधानाध्यापक राजन पाठक, सहभागी विद्यालयका प्रधानाध्यापक, शिक्षक, सुरक्षाकर्मी, समाजसेवी, नागरिक समाजका प्रतिनिधि तथा विद्यार्थीहरूको उल्लेखनीय उपस्थिति रहेको थियो।
दुई दिनसम्म सञ्चालन भएको प्रतियोगितामा विभिन्न विद्यालयका छात्रा टोलीहरूले उत्साहजनक प्रतिस्पर्धा गरेका थिए। प्रतियोगितामा उत्कृष्ट प्रदर्शन गर्दै प्रथम, द्वितीय र तृतीय स्थान हासिल गर्ने विद्यालयका टोलीहरूलाई पुरस्कार, मेडल तथा प्रमाणपत्र वितरण गरिएको थियो।
कार्यक्रममा वक्ताहरूले खेलकुदले विद्यार्थीहरूको शारीरिक, मानसिक तथा नेतृत्व विकासमा महत्वपूर्ण भूमिका खेल्ने उल्लेख गर्दै यस्ता प्रतियोगिताले छात्राहरूको प्रतिभा उजागर गर्न थप अवसर प्रदान गर्ने विश्वास व्यक्त गरेका थिए।
पुरस्कार वितरणसँगै प्रतियोगिता औपचारिक रूपमा समापन गरिएको आयोजकले जनाएको छ।
